「龍哥精選」個象拔蚌肥牛套餐，認真抵食！兩個人食到捧住個肚走，性價比爆燈～
象拔蚌真心生猛，口感爽脆到「嗦嗦聲」，鮮甜唔腥，完全無渣，正過海鮮檔即開㗎！
冰鎮三寶必試個肥爽豬手，皮彈肉嫩，凍食更加突出膠質，麻辣牛粒麻香唔死辣，拍青瓜酸辣開胃，食完即刻醒神！
手切牛肩雪花靚到呢🥰😍滾兩滾入口即化，牛味濃得嚟唔羶，油脂甘香掛住個喉嚨，忍唔住encore多碟！
黑豚肉唔係普通冰鮮貨，肉質紮實帶咬口，豬肉甜味出奇地突出，連平時唔食豬嘅朋友都搶咗幾塊。
脆腩片就真係名不虛傳，淥完保持脆口，油脂炸到似豬油渣咁香口，邪惡但停唔到口～勁鮮甜！
呢間所有肉類都係老闆自己親手切！從來都唔用機器切！！！
墨魚丸手打果然唔同，咬落「啵」一聲彈牙，入面仲有墨魚粒增加口感，鮮味十足。
雲吞同韭菜餃都係自家包，皮薄餡多，雲吞蝦肉大隻爽身，韭菜餃菜肉比例剛好，菜青肉鮮無雪藏味。
湯底揀咗苦瓜排骨鍋，苦瓜甘涼完全唔苦，排骨燉到軟腍，個湯底飲落清潤，打邊爐唔會越食越鹹，加分！
最後淥個稻庭烏冬索盡湯精華，魚皮即叫即責脆到似薯片。成個套餐份量夠3個女仔食，質素拍得住酒店火鍋！
