座落半山，環境優美，唔單止有住龍華酒店相關o既紅燈籠裝飾，小屋外一個小小o既園林有住石山流水，亭台樓閣；唔算好大規模，但係足夠提供靚景俾你一站式食個high tea，打個咭。
侍應哥哥推介o左兩款湯水，分別係海帶夏枯草燉老鴿($58)，話有住清熱解暑o既作用；同埋花旗參百合綠豆燉乳鴿($58)，能夠補肝腎益氣。天口興，即管試番碗海帶夏枯草。d 湯水係自家製再預先pack 好，你點o既時候佢就坐番熱俾你。會飲得出係足料燉o左好長時間，比普通雞湯濃郁好多，味道鮮甜，果真高質！
另外我地都試o左一d 包點，叫o左一客奶黃包($28/4個) 同一客豆沙包($28/4個)。豬豬o既造型趣致可愛，耳仔同鼻鼻都係o個d 包皮，不過染o左色。食住甜甜o既包，洋溢住幸福o既感覺。
我見佢d 水果茶用括弧括住相關o既五行，應該又係有d 中醫理論o係入面。朋友叫o左杯藍莓黑加侖茶($28)，紅色的，我聞到好香，黑加侖子o既味道好出。
至於我o既蜜桃水果茶($28)，侍應特登提一提呢個係比較特別，係綠色的。佢氣味清新，聞起上o黎有住微微o既薄荷香氣，見到茶包除o左果粒之外仲有d 植物o既葉。蜜桃味唔重，亦唔甜，微微酸，同埋依稀帶d 啤酒o既麥香，唔錯！
