湘川滬 (已結業)

回到香港，出街食第一餐就俾人捉左黎飲茶。因為其實旺角不是有太多好的酒樓，最後就來了湘川滬，因為感覺可以坐得舒服D。大概兩點黎到，可能係假期既關係，所以要等位。最後由於太多人等，阿姐問大家搭檯介唔介意，由於我太肚餓，所以搭檯都無咩所謂啦。這裡好既係搭檯都唔會有咩大混亂，所有食物檯號都無搞錯，幾好呀。不過可能由於比較遲，所以有幾款點心都無哂啦。我地叫左一個銀絲卷，其實係見到人食好似好好味咁，或者我真係太耐無食過中式野啦。個銀絲卷等左好耐先黎到，味道無咩特別，感覺唔會搓得太厚，入面真係食到一絲絲卷住咁，不過當然唔係好微細啦，要黎點煉奶食一定唔會難食。另外仲叫左個芋蓉卷，呢個幾好食喎。雖然感覺有點點油膩，但入面既芋蓉真係好香，出面煎得脆脆的，有點煙靱的感覺，要黎做甜品幾好。另外叫左個鎮江肴肉，呢個就麻麻地啦。吃落去味道較淡，而且肉質很實，感覺不是很新鮮呢。最後叫左個咸魚雞粒炒飯食，呢個就OK啦，無咩特別，炒飯唔夠乾爽，有點點油膩，不過材料都算足，勉勉強強啦。係度坐左成個幾鐘，非常舒適，今日休息完聽日就要開工啦，加油加油!!!