Boomshack (已結業)

同朋友之前去糖廠街市集食野掃街，俾我地發現左依間個餐廳炸雞窩夫好好好食 ，今晚特登過黎食多次回味下。環境幾舒服同三五知己黎飲野食野吹水都唔錯。墨西哥炸栗米片配牛油果醬 ($73) : 粟米片本身有蕃茄辣醬，不過朋友怕辣所以加左牛油果醬店員仲送左酸忌廉醬俾我地試下，粟米片就普普通通蕃茄辣醬有少少辣，不過牛油果好甜加上粟米片咸咸地好襯 。吞拿魚他他配墨西哥脆片($68) :吞拿魚上面有D牛油果成個外型紅紅綠綠色彩好靚。細細件可以一次過放入口，你就可以一次過食到牛油果既甜、吞拿魚既鮮、墨西哥脆片既咸三種唔同既味。炸雞窩夫+特製芝士 ($88) : 今日主角 炸雞都食過唔少，不過佢係特別脆同肉滑加上半溶芝士同用香軟窩夫啖啖滋味，真係食過幾多次都想再食過。牛小排玉米餅 ($148) : 玉米餅有嚼劲香酥可口，牛小排用左12小時煙燻好淋帶微辣加,上義大利青醬同混合芝士好正 ，食一件都好飽肚。香蕉榛子醬窩夫 ($50) : 甜品有我最喜歡既榛子 ，超多醬每一啖都滿口榛子同香蕉好味好滿足。低糖綠茶 : 開頭望個罐身以為係啤酒見到字先知係綠茶，雖然係低糖不過一D都唔淡味仲甜甜地。