餐廳既裝修偏簡約，比人感覺乾淨企理。見到餐牌有一人/二人套餐，我同男朋友決定叫個二人餐share，入面包括2個主食，4個小食，同埋2款飲品。
〈辣Tuti雞配厚切豆腐〉
雞髀夠晒大隻，肉質幾嫩滑，咬落亦好夠肉汁好juicy，一啲都唔乾。另外佢既醬汁都幾惹味，辣得嚟帶微微甜酸，好有印尼特色，撈飯一流！
〈辣Tuti醬炆牛腩〉
呢個醬汁同辣Tuti雞既醬汁係一樣既，牛腩炆得好淋好入味，男朋友讚呢個牛腩有驚喜，有水準。
〈牛肉粒粒薯仔餅〉
薯餅入面撈左粒粒牛肉碎，薯餅既口感綿密，外表微微煎過，食落香口。
〈惹味唐芹伴豆筋〉
唐芹豆筋口感爽脆，少少辣，幾開胃。
〈百香果蜂蜜茶〉
入面有粒粒既百香果肉，果香味好重，加埋蜂蜜飲落感覺幾滋潤，甜度亦啱啱好。
〈野生松茸鮮雞湯〉
飲品加$18就可以升級轉湯，睇左介紹呢個湯係用鮮雞肉同埋松茸熬製而成，果然飲落去雞既鮮味好出，好滋補，值得一試。
