泰園 (已結業)

天氣突然轉凍，今晚同朋友最後一分鐘約嘅晚餐，想BOOK打邊爐但係全部FULL BOOKING，最後開OPENRICE睇吓泰菜有邊間可以選擇，朋友有小朋友所以地點＆座位都好緊要。睇完OPENRICE入面環境相同地點，最後選擇泰園。地點都方便，朋友架BB車由地鐵站一路都係平路到餐廳樓下，餐廳有足夠空間擺放BB車，非常舒適。泰式刺身盤（中），眼見每一抬都會點選，入面有象拔蚌，生蝦，聖子，帶子，配一種特製刺身汁，偏酸帶少少辣。刺身夠鮮，帶淡淡海水味。價錢唔算貴，有4種款式刺身，適合貪心嘅我！鮮蝦春卷，春卷皮夠香脆，蝦係鮮海蝦，夠彈牙，配青咖喱汁，減少油膩感。生醃牛肉沙律，只用檸檬醃熟牛肉，牛肉肉質鮮嫩，仲係粉紅色，證明真係生醃成，調味有洋蔥，香芹菜，魚露，檸檬，辣椒。糯米釀雞翼，去骨雞翼，裡面嘅糯米香軟，食落皮香肉嫩，裡面又有咬口。泰式爆炸波士頓龍蝦，辣味都幾強勁，波士頓龍蝦走油都做得幾好，好乾身。唔食得辣，就要小心喇！餐廳環境都幾熱鬧，好適合一家大細聚餐，特別係有小朋友嘅家庭，唔使驚噪到其他人。