一坐低，當然拎左野飲先，除左涼茶同汽水，仲有好多款唔同牌子嘅啤酒，Asahi、1664、泰啤、嘉士伯同新力都有，另外仲有清酒。
除左罐裝野飲，仲有果汁同咖啡。
佢地嘅任食套餐分左三款，分別係Level 1-3，Level 1只可以以揀自助區嘅野食野飲，Level 2就多左水產、刺身、壽司、安格斯美國牛肉同多款特飲，而Level 3就有埋黑毛豬、日本同澳洲和牛。我地揀左最貴嘅Lvel 3套餐，因為係中午時段黎，所以$398/位，星期五六日假期同前夕另再加$28。
因為烤肉都冇調味，所以每張枱都放有玫瑰岩鹽可以自己加。
堅鮮菠蘿冰＆奶蓋華田火山脆脆 - 菠蘿冰好多菠蘿，味道香甜。華田脆脆都幾濃華田味，上面仲放滿好多朱古力脆脆。
芥辣八爪魚伴青瓜 - 青瓜比八爪魚多，不過放題場預左，芥辣味夠出又唔會太嗆鼻，都唔錯。
刺身 - 正常放題質素，可以接受。
雞泡魚乾&魷魚乾 - 平時居酒屋一客雞泡魚乾都要七八十蚊，估唔到哩度有得食，乾完之後唔會乾柴柴好更咁，同居酒屋質素唔差得遠，必食！
燒菠蘿 - 雖然唔係厚切，但燒完之後非常香甜多汁又冇渣。
蒜蓉孜然燒茄子&煙蔥芝士扒大啡菇 - 因為茄子同啡菇都比較厚身，所以建議盡早落單，放喺爐邊等佢慢慢燒，燒到佢軟身都要燒一個鐘以上。茄子同大啡菇雖然燒嘅時候我冇補水，但燒完都好juicy，非常好食。
水產 - 叫左燒生蠔、燒虎蝦同多春魚，水產都有睇頭，解凍我夠，生蠔有芝士同蒜蓉兩款，都幾厚肉，海蝦蝦肉結實，以任食黎講質素唔錯。
烤肉- 因為我地點嘅係最貴嘅Level 3套餐，當然要試晒佢啲靚肉，所以我地點晒全部嘅日本同澳洲和牛，同重點揀幾款美國牛肉黎試。佢地嘅和牛都幾靚，雪花紋好平均，解凍得夠，又唔會切到碎濕濕。
豚肉解凍情況就爭啲，不過肥瘦適中食落唔會太鞋。
一口牛幾有咬口。牛舌雖然唔係厚切，不過食落都彈口。
甜品雖然唔算多，雪糕亦只有雲呢拿同朱古力味，不過Coco berry哩個牌子味道幾出都幾好食。
總結，好難得任食可以有咁多款唔同啤酒任飲，就算係最平嘅Level 1都可以，酒鬼最啱。Level 3嘅靚牛質素幾高，不過如果預計唔係食好多肉，我覺得Level 2有晒刺身壽司水產美國牛同特飲都好夠食。QR code落完單都好快上枱，亦冇漏單情況，收碟都快。
