好包 (已結業)

懶人無骨雞翼包賣到出晒名，趁朋友入泥元朗玩帶佢地去試下新野～灰色轉角小店好易認，去到人頭湧湧，有好幾款已經賣晒，睇下叫咩好先。最後點左兩款雞翼包，加杯洛神花蜜梳打。食物即叫即整，係要等耐少少～撞啱假日人比較多，不過都係等左3,4個字就有。嘆一嘆梳打先～分開上又幾得意，可按個人濃度喜好隨意加梳打水。加完飲一啖，洛神花味道唔夠出，如果鐘意濃味啲嘅朋友加一半梳打水應該會好飲啲～然後再嘆無骨主角，青咖哩雞翼～包身軟綿綿，揭開入面有煎香嘅痕跡，雞翼去骨後顯得較細粒，但漲卜卜無損佢嘅吸引力～咬喇咬喇，肉質嫩滑，好juicy呀～青咖哩味亦慢慢滲出泥，唔辣不過咖哩香氣十足。另一款蜜糖雞翼，包身一樣鬆軟，雞肉一樣嫩滑～係蜜糖味比較清香，無青咖哩味咁濃味，食到雞肉煎香嘅味道，加埋蜜糖呢個絕配，平凡菜式都可以好好味～如果可以多少少菜，層次應該會更豐富。呢間意大利包包小店，食物唔錯，店舖較小，欣賞店主好細心喺門口對出擺啲枱仔同傘，當係露天cafe坐下都幾嘆～