Thai 2.0 (已結業)

之前嚟過呢個鋪位食泰菜，發現轉了手，都係泰菜，所以都可以嚟食下。裝修時尚簡約，餐枱算闊落。基本上嘅泰式菜都齊全，價錢都係60幾蚊起，選擇亦好多元化，只係冇晚市套餐，全部散嗌。泰式木瓜鮮蝦沙律係我不嬲都好鍾意食嘅菜式之一，佢哋都算正宗，份量亦好多。泰式椰汁雞湯係我近年鍾意飲嘅湯，貪佢唔似冬陰功湯咁辣，一路煮住個湯，保持溫度，飲到後邊椰汁味更濃烈，雞肉嫩滑。黃咖喱牛腩，牛腩質素好，炆得好琳，牛味亦濃，好有咬口。心形擺設嘅芒果糯米飯，好吸引人，水準合格。