魚翅城酒家 (已結業)

應是第200篇食評, 打就要打篇有紀念價值的。上星期五就近損友生日, 堂與堂之間有2小時break, 因利成使, 便落了魚翅城食lunch。要了個$480套餐, 有雪菜火鴨絲豆腐一碟, 點心三款, 八兩紅燒翅, 炸子雞半隻, 雞湯波菜, 海鮮炒飯及糖水。份量都不少的。翅好足料, 啖啖翅, 湯汁味道都過得去, 這個翅, 是pass的。不過計我話, 翅跟雞湯才是絕配。豆腐賣相幾好, 味道一般, 我覺得豆腐唔夠滑。點心反而幾唔錯。我們選了蘿蔔絲酥餅, 鮑魚燒賣及小籠包, 蘿蔔絲酥餅不油, 鬆化, 帶有蘿蔔味, 唔錯; 鮑魚燒賣味道都過得去, 稍嫌蝦多過豬肉太多; 小籠包不像街上的爆出啡色高湯的湯包, 而是穩打穩紥的肉汁, 我甚喜歡。炸子雞過肥, 猶幸皮脆, 味道都可以, 伴碟的藕片食味似薯片, 驚喜。最喜歡是雞湯菠菜, 菠菜中夾雜著很濃甜的雞湯味, 我是拼了命的吃。炒飯料都算足, 味道是收貨的。最失望是糖水, 將綠豆沙"畢"到成個碗邊都係, 略"那渣"; 食味也失望, 很難吃。豆腐花比綠弄沙好多了。侍應好smart, 沖茶十分快手, 而且會自動幫我地加茶葉,唔錯。兩點多仲爆場, 係有d計。