奏海鮮火鍋 (已結業)

星期五晚響尖沙咀搵食，冇book位真係好難！咁岩見到有間新開嘅火鍋店，可能天氣轉熱咗好多，所以walk in都竟然有位！好彩我行快兩步，遲20分鐘都無位！地點就係尖沙咀寶勒巷馬會對面上二樓。其實出邊已經坐滿晒人， 剛巧只剩VIP房！我哋真係好好彩！坐得闊落之餘仲有電視睇！呢度除一般火鍋之外仲有好多刺身！食物選擇好多！打邊爐嘅醬料都好講究！其中以XO醬最為惹味！鍋底方面我哋揀咗海鮮鍋！估唔到入邊材料勁多！有勁大隻肉蟹， 海參，蟹柳，蜆，豆腐同菜！個湯底勁甜！未開始邊爐之前我已經飲左一碗！甜中帶少少辣，辣味係來自黑椒嘅！本身海鮮屬於涼性，加左啲黑胡椒後對我呢啲虛寒人士好好！打邊爐最緊要都係肥牛！我哋今晚叫咗手切黃牛，職員話呢個係邊脊位， 肉味較濃而且肥瘦適中！有𡁻口得來又滑唔會太韌！職員真係冇介紹錯！而且我哋只係叫咗細碟已經好多！好抵食！呢個係松露帶子餃，估唔到入邊有原粒帶子，帶子仲要好鮮甜！黑松露味亦都好突出好香。呢個係手打蝦丸， 初頭諗住平平無奇， 點知原來勁彈牙！而且蝦味好濃， 入面仲食到啖啖蝦肉！每一粒都勁足料！鮮炸響鈴好大份！職員介紹原來可以就咁點泰式甜酸醬食！就咁點來食勁鬆脆！