安安燒 (染布房街) (已結業)

係呢頭唱完k，朋友話上網睇下有咩好食，佢就搵到間食串燒，仲要唔使自己落手添，一於去試下。一入間鋪頭已經聞到重慶燒既果陣香味，我最喜歡呢種香，令我口水都流埋。第一樣先食燒原隻鮑魚，鮑魚原隻連殻上，上面鋪滿蒜蓉，辣椒同蔥，賣相又紅又綠已經好靚仔。鮑魚食落肉質彈牙，一咬就將裡面既鮮味流晒出黎，加上調味令味道更惹味更香，相信自己燒就無燒得咁靚仔。食燒物又點少得食牛肉，第二樣係安格斯肉眼牛柳串，一串有幾粒牛柳，大小同一口牛差不多，第一啖已經食到安格斯牛既鮮牛味，肉汁鎖晒係肉裡面，肉眼部位少脂肪，令每一口都係肉味，油量少岩晒我注重健康既人。食完牛就食雞，燒雞肉軟骨串，一口咬落去既有雞肉嫩滑既口感，又有雞軟骨脆既口感，雙重口感係今日最特別既串燒，一種串燒兩種享受，睇得出餐廳有心既選料。食左咁多肉，就要食返蔬菜類先得。點左燒翠肉瓜，由於翠肉瓜本身味道唔夠出，餐廳用左芝士黎燒，效果出黎又唔錯，芝士半溶係翠肉瓜上面，令爽脆既翠肉瓜加上果層薄既芝士，感覺有點像fusion，加上翠肉瓜裡面既爽甜多汁，就如燒烤後飲了一杯涼茶既作用。