慕名黎試下
行到黎發現原來開正譚仔隔離 御一品對面
過幾個鋪位又有間賣薯粉
長沙灣青山道真係香港米線街黎
因為新裝修 舖面非常光猛
裝修同一般米線舖風格唔同
比較乾淨同colorful 又設計左專屬公仔😂
座位闊落 坐得幾舒服
舖頭用QR code自助落單
湯底選擇比較多 有胡椒豬肚 新疆 水煮 麻辣 酸辣 清酸辣 蕃茄 清湯
配料就大部分無乜太特別
比較特別既係日本溏心蛋同有款叫6DEE腩肉既揀
咁我第一次食就叫左呢兩款餸再加豆卜
湯底就叫左酸辣中辣
一上菜就覺得賣相好吸引
好紅 d配料排到好滿 個湯煮到起晒沙
不過食落就無睇落咁吸引
可能係差梗d香味 味道差d層次
但真係好有小店煮米線會有既鍋氣
食得出係逐碗用心煮果種
overall唔差既 但無去到好驚豔
米線都彈牙既 浸左陣都無覺得太腍
配料份量真係好多
所謂6DEE腩肉其實滷水腩肉 都幾好食
溏心蛋就不過不失 無乜評論
另外仲叫左碟辣DEE雞軟骨
面灑左好多孜然粉
聞落好香 但食落無乜味
飲品揀左熱菜蜜
覺得譚仔果D菜味濃D香D
呢度有d死甜既感覺
整體黎講我覺得係值得再試
不過下次想試下其他湯底 例如新疆同胡椒豬肚
