甜舍 (已結業)

同柑太吃過正餐，自然要食埋甜品，係九龍城街上行行下,發覺有個易拉架話有間甜品店係附近，於是就同柑太去試下。行到門口外，發覺店內空無一人，個心都突一突，會唔會中伏呢？但都抱住一試無妨心態入去。坐低細閱餐牌後，柑太點了心太軟，我就點法式梳乎里。等待期間再睇下店內四周，發覺牆身畫上大大隻dessert room字眼，但燈光太暗有點美中不足。之後陸續都有數名食客入座，而其中一席的情侶點了和我們完全相同的甜品。大約等左廿分鐘，梳乎里同心太軟就同時上場。心太軟味道好濃，流心比較少，但好濃的朱古力補救左，整體而言如果可以流心朱古力多d就更好。梳乎里果然是法式風格，食到最底有燉蛋在底下，而梳乎里本身亦非常鬆軟香滑，蛋白煮得夠熟不帶半點腥，當中的雲利拿子入口令梳乎里本身的味道更突出，伴碟雲利拿雪糕令一個甜品有兩種享受。