我地落車時亞媽話想去食金山,不過實在係太多人等梗,咁岩我又好想食泰國野喎~咪走左去對面間泰菜館,亞媽開頭望入去話好少客,都唔知好唔好食,但我一向都唔會理環境有幾多客,覺得咩都要試下嘛,所以我就叫左佢地入去喇~
入到去個環境都好整齊,周圍都有電視睇(最岩我地D電視迷),枱與枱之間有好多空間,就算坐爆都唔會覺得好逼.每枱客人坐低都會有一兜泰式蝦片送,我地都覺得好好食(唔係因為肚餓,係真的好味喎),我地點左既食物如下:
1)串燒(雞同豬各3串)因是日初一所以唔食牛肉,下次再去食--燒得岩岩好,D肉唔會太實,加埋個醬好好味,不過比起其他野食,佢就普通左D!>>>$48(半打)
2)生蝦--其實之前成日都食生蝦,不過都無試過覺得特別好食,但今次D蝦既肉實彈牙,又大隻又好新鮮,連我亞婆都話正,食完又食(佢不嬲都唔好生野架)>>>$72/10隻(物超所值)
3)炒泰苗--鍾意食淋菜既人唔岩食,除左我男友,我地3個都覺得好鮮嫩又爽口>>>$48
4)焗蜆(連已烘多士)--嘩~呢個真係好好食,外型又特別,嚮呢度真係好難以筆墨形容,個汁好正,不過少左D,食既時候係要將D蜆放落塊多士上面一齊食架!D多士又烘到岩岩好>>>$78
5)菠蘿炒飯--以前D人成日都會話個菠蘿用完又用,但呢度我覺得無咁做囉,因為我盛飯既時候用匙篤過個菠蘿謗,真係有菠蘿汁出架,D飯又沾有菠蘿汁既味道,個炒飯入面D料都好多,我地每人盛到一碗大既,都係好味架!!不過對我黎講甜左D~~材料包括八爪魚,青口,提子乾,蝦等等....>>>$78
6)泰式拼盤--有蝦餅,魚餅,春捲,炸南瓜條,荷葉雞,雞翼等...睇落去好似好熱氣咁,但其實一D都唔油膩,全部都整得剛剛好,隨碟有兩種醬跟埋,一個甜D一個酸辣D,兩個都幾好食,不過我地大多選擇返點生蝦附有既醬汁.>>>$88
7)蒜茸焗蠔--呢個係送既,可能因為新張關係所以送比我地食,不過一D都唔求其,又香又多汁,薯蒜份量適中,一D都唔膩,我地睇個偵錢都係四五十蚊,有4隻,都唔係好貴.
總括樣樣野都好有水準,一定會再黎,有加一服務費,全程四百幾蚊.
(以上價錢是大概,因為我無記性唔記得左,不過最多差幾蚊,唔會差好遠)
不過都有一樣唔好既,就係未試過有人主動加水,每次都要叫囉!!個水杯又細左D囉!我地飲好多水架,所以都唔好意思成日叫人加水~~
