發記茶餐廳 (已結業)

好耐無試過晨早得閒去食早餐, 皆因今朝請左半日假, 去左佐敦~十點零見仲未夠鐘返工, 又見餓, 去附近搵食~~~見到翠華D早餐的確吸引, 可惜我因為牙痛, 連最鍾意既奶油豬都食唔到, 唯有再去其他地方搵食啦, 行過幾步, 見到一間鋪仔細細既, 又好似好舊咁, 望下個餐牌, 廿蚊個早餐, 其實唔算平, 不過, 有麥皮餐, 我可以食, 咁就入左去啦~~~間鋪都算多客, 細細地但已經坐滿人。叫左個麥皮+煎雙蛋+牛油方包+熱奶茶, 廿蚊~!麥皮 - 碟身比較矮, 都幾少, 麥皮都幾多, 奶亦滑, OK既, 略嫌唔夠食。煎雙蛋 - 兩隻蛋煎在一起, 同一塊蛋白, 有DD功夫, 不過, 蛋白不夠燶, 蛋亦屬一般, 沒有蛋香, 沒有太大蛋味。牛油方包 - 包孔多, 不什麼喜歡, 牛油等於無塗, 無味。熱奶茶 - 接受到, 不過茶味單薄, 不是港式茶餐廳的應有味道。奶或茶都不濃, 就像是自己用粉沖既質數。整體而言, 都勉強接受到, 可能其他既野會好D, 如果唔係無理由咁多人。