小肥羊 (已搬遷) 新店位置

今晚我們喺荃灣做完嘢之後，行過大鴻輝「荃灣」中心，喺大門口位置有好多個分別係唔同食店嘅派傳單員，其中一個係「小肥羊」嘅傳單員就同我們推介話而家做緊每位$118起任點任食火鍋，仲要係無限時，聽落覺得好似幾抵食，所以我們就決定去食晚市任食火鍋！但上到去一坐底，店員攞個餐牌畀我們睇，但一睇到餐牌上所謂最平嘅係每位$138，並唔係宣傳單上印嘅$118，$118祇係午市嘅價錢！雖然唔係話貪平嘅問題，但感覺有啲「被騙」咁！但我們唔會即刻起身走咁衰，而係繼續坐底喺度食，而我們就揀咗每位$138，有羊帆起航、小肥羊精品肥牛、日本黑豚肉同滑鷄片係任點任食，另外如果再要食其他嗰啲就要另加$68！經典滋補清湯鍋雖然係清湯，但有大量嘅香料同大蔥，所以湯底嘅味道好清香惹味！小肥羊精品肥牛嘅脂肪比例超多，差唔多仲多過肉，感覺非常油膩，初頭睇到個名話精品肥牛，以為會好優質，但諗唔到會有咁大嘅分別！日本黑豚肉嘅肉質都幾爽滑！滑鷄片嘅肉質好鬆軟嫩滑！另外設有自助區域，有冷盤、熟食同新鮮蔬菜，除咗冷盤同蔬菜都幾好之外，熟食就唔算好理想！