動漫樂園及主題餐廳 (已易手) 新餐廳

今日專登坐的士過黎呢間傳聞中大人細路都啱，又好玩又好食的親子餐廳...門面的確好吸引，有d精品賣，內有夾公仔機，有籃球機，有推寶石機等等，再入少少見到間cafe 啦，唔算大，但因為冇人食。7點鐘黎到見冇人真心嚇一嚇，話就話平日，都唔使咁靜。有sofa位坐，但d位排到好迫，要移動張枱先入到去坐，d枱又係有角，基於安全考慮，唔想個囡行出行入撞親，坐番出d嗰行，一邊sofa,一邊餐椅，將枱移出些許先覺得安全。野食方面唔貴，一個餐加野飲7x,加多22蚊有湯同甜品，但唔建議加，因為個甜品好細件,一個糯米池 size. 另外半價買左個mixed berry 沙冰，本身想飲奶昔，但要原價買咁就慳番。意粉同焗飯味道不過不失，反而個雜扒飯有驚喜，幾好食，唔會太淡，雞肉，牛肉都幾嫩口。玩嗰方面俾左會費20蚊，再用100蚊買65個coins,入會送多10個coin, facebook like and share多個10個，total 85coin係張卡入面。一個2歲的b自己插卡同工人一齊玩，半個鐘就冇晒，發現原來一次遊戲最少扣8蚊，而我b拎得幾粒寶石番黎就唔見左我100蚊.。