錦麗 (已結業)

平時見呢度咁多人排隊，今日特登黎試吓有咩咁好食。排隊等咗大概五至10分鐘到，就到我哋，入去侍應都好有禮貌，舉手都好快應我地。餐牌嘅選擇唔多，大部份都係河粉。我哋叫咗個錦麗綜合河，同埋煎蝦餅。等咗大概5分鐘到就上，個綜合河牛肉份量好多，但係河粉嘅份量就好少，食到最後都唔係話好飽，而且個湯唔夠熱，入邊嘅生牛肉淥到最後都唔熟，我都唔太敢食。入邊嘅牛展好大舊，牛丸都算彈牙，但係啲湯就好肥，唔敢飲啲湯。至於個煎蝦餅，煎得到香脆，咬落食到粒粒蝦粒，而且彈牙，都係人手打嘅味道。不過總括來講，我覺得個河粉除咗個牛丸同牛展之外，質素真係麻麻地，唔太明點解啲人成日排隊。