印尼餐廳 (已結業)

上年年尾嚟食飯。對上一次嚟都係幾年前，印象中間嘢黑忟忟，但係而家唔知係咪裝修咗，光猛晒，仲唔知整乜鬼鬼死咁多人，九點幾仲有人等位添。六個人食咗打半串燒、巴東牛肉、加多加多、醬燒雞、印尼炒飯、煎鮮魷，後來唔多夠，再叫多個金沙骨同馬拉盞炒通菜。啲嘢食味道普通，份量就好少，而且個menu其實唔係咁多嘢揀。其間成日有人走埋嚟pud飯俾我哋，但係因為明知要收錢，所以冇要到。後來到埋單九百幾蚊，我攞張單一睇，計咗九蚊乘六嘅飯錢，即刻同佢講啦，個阿叔EE哦哦咁：「哦…多咗呀…」之後就減返個數出嚟。我簽咭嗰吓佢喺我身後大大聲講咗幾句唔知印尼話定鄉下話，可能係話：「你班港燦坐粒幾鐘阻鬼住晒，收多你五十四蚊都唔x俾!」如果佢喺印尼開餐廳，相信暴動會由佢間舖開始。