廉記冰室 (春園街) (已結業)

最近每星期總有一兩日會係灣仔出沒，午餐地點太多選擇有時反而唔知點揀🤔。好在朋友同事們都好有主意。好似今日佢地就帶左我去呢間近期出名嘅冰室。老實講，我唔係好知佢出名係邊，但今次點嘅「男人最愛」套餐，我就大概明白點解唔單只男生， 就算好似我呢啲女生都愛點！個套餐好大份而且內容豐富：有火腿奄列、菠蘿油、豬扒腸仔麵，再配飲品，六十蚊有找喎，的確係「廉而有信」囉！個菠蘿包雖然唔係熱辣辣出爐，但都皮酥包嫩😜，配上一大厚片牛油，鍾意食嘅我邊內疚邊暗爽！個奄列內餡勁多火腿，一啲都冇慳住慳住。而豬扒腸仔麵，塊豬扒大到蓋住成個碗，腸仔係雞肉腸，兩樣都不過不失。麵好意外佢係用福字麵instead of大光麵，所以食起嚟好似冇咁飽滯(平衡番太多嘅餸😁) 。咁抵食，你話係咪連女生都愛吖？！