品粵居 (已結業)

今日接完個仔返童軍加上外母隨行，搵間中菜晚飯自是不二嘅選擇，難得發現喺銅鑼灣嘅邊垂都有間咁企理嘅中菜館，就過嚟試下。椒鹽脆皮豆腐，豆腐份量甚豐，外脆內軟，豆味香濃，炸得夠脆，只係簡單以少少淮鹽同埋喼汁調味已經相當好食。百合蜜豆炒淮山，切成條狀嘅淮山經過走油處理，有夠誠意，同清新嘅百合蜜豆相當之夾。石岐燒乳鴿，皮脆肉嫩，鴿肉保時住應有嘅肉汁，相當出色。砂鍋啫啫文昌雞，啫啫雞一擺上枱香氣撲鼻，大蒜、蔥頭、香蔥加上紅椒同滑雞嘅味道充分融和，非常惹味。