鮨亭 (已結業)

今日去屯門大會堂表演完唱歌之後，我同朋友興起想食壽司，於是就去到呢一間店度享用日本料理，我比佢外面優美而且有格調嘅環境吸引，好多傳統嘅日本燈籠都掛咗喺外面恍如置身於日本小店內。我哋好肚餓叫咗一個一人前，同埋一個廚師發版Omakase。冇諗過上菜速度都幾快，一人餐裏面大部份都係我喜歡食嘅嘢。包括迷你和風沙律同埋蟹籽蒸蛋，鱆紅、三文魚同劍魚腩。不得不提安格斯牛扒整得非常之好味，濃郁嘅醬汁佈滿牛扒，厚度適中，唔會有咬唔爛嘅情況出現。肉汁好夠，燒得好香甜，好快整個手掌咁大塊嘅安格斯已經俾我哋全部蒸發。仲有我真係好鍾意個鰻魚炒飯！鰻魚炒飯火喉十分足夠，整得非常之好，佢嘅飯粒配上鰻魚汁非常香，加上鰻魚肉亦佈滿整個飯，用料充足，吃下去非常滿足。廚師發板刺身都好多款式，有平時少接觸的金時鯛、金線鯛同鰤魚等等。賣相尚算吸引，大部份味道都唔錯及處理新鮮程度上面有一定嘅功課，因下面嘅冰塊都好足夠。每人結帳＄200，算係合理範圍之內。