Lardos Steak House (已結業)

傍晚約六時左右到達，由於睇到報紙介紹，我同太太臨時決定試一試，所以無訂位。好彩都俾到我地，要7:30前埋單。不過無所謂，反正都食唔到咁耐。因為聽聞牛扒出名，所以我地分別點左西冷牛扒同肉眼扒。可惜點菜前我唔知道，佢地將牛扒分左三級，而餐牌上只係最低級。只好怪自己無知，唯有下次有機會先試下頂級牛。先上係沙律同麵包，沙律好新鮮。麵包質地幾特別，唔算厚身，但好有質感同口感。主菜之一：西冷扒配上薯角，再加上黑椒汁。我唔知佢地係唔係用炭爐，但有少許炭燒味，不過唔濃烈。肉汁唔算豐富但幾有味，只要加上少少芥末，就已經帶出肉味；反而加黑椒汁仲麻麻地。主菜之二：肉眼扒配焗薯，再加上紅酒汁。肉質較腍易入口，但略為肥左少少；紅酒汁香濃惹味。焗薯幾好味，又有幾種配料伴隨，其中煙肉香脆可口。由於太飽，所以無試到佢地o的甜品。整體我都好滿意，但侍應似乎真係唔夠專業。既無推介任何食品，招呼亦唔算熱切。餐廳唔算大，而且都好似好多人訂位。尋日6:30左右已經唔接街客。所以有心試都係打電話留座比較好。而如果有心楂(駕)車去，6:30錶位就爆晒，聽聞可以泊入村，但未經證實。