小曼谷泰國菜館

營業中

休息中

好耐冇食過泰國菜啦，今日返左去屯門，當然要去食屯門小曼谷啦！去到先知佢哋搬咗新鋪，位置喺舊舖嘅後面，環境大左，亦冇之前坐得咁迫。每次去都會嗌菠蘿炒飯，金邊粉等等嘅主菜，但今次去食真係好失望😓菠蘿炒飯比之前細份左好多，唔再用菠蘿裝住，感覺已經冇咗菠蘿炒飯個風味。食落唔夠鑊氣，而且唔夠熱，都係以前好食啲👎🏼金邊粉同樣都係唔夠熱，味道好淡，份量好少，多人食嘅話都係嗌兩碟好啲。每次食泰菜都一定會嗌冬陰公湯。我地點左細嘅size，但真係得好少，四個人飲每人都淨係分得兩三啖，建議兩個人嘅朋友嗌細size～但係都係同一個問題，湯有少少凍，無酸辣嘅味道，同喺泰國飲嘅差好遠😣另外再嗌咗炸蝦餅、薄餅、青咖喱豬同埋馬拉盞炒通菜，呢幾樣就做得不錯啦。蝦餅即炸即上枱，夠脆夠熱；薄餅點埋青咖哩食都幾開胃，咖哩撈飯一流。最後點埋芒果黑白糯米飯各一份。$14一份，份量偏少，食到飽飽地同朋友share就差唔多。糯米飯啱啱蒸好，暖暖地配埋凍冰冰嘅芒果，口感不錯～不過唔知係咪因為換左鋪嘅關係，味道冇以前咁好食，希望之後會有更好嘅改善啦。