Cow Bean (黃埔天地) (已結業)

我同男朋友都好鍾意食牛，聽朋友講cow bean有勁多好平又唔錯嘅牛扒餐，所以搵咗一日去食😆未入到去等咗陣位，因為晚餐時段都幾爆場，個個都叫牛扒。好彩幾分鐘之後有人埋單，一位短髮女店員就帶咗我哋入去。一坐低未睇餐牌，已經聞到隔離前後左右傳嚟好香牛肉味。因為美國牛大牛肉味啲，我同男朋友都揀咗美國，加上我鍾意食腍啲，所以我叫咗美國肉眼（300g)套餐，揀咗黑椒汁 $158😎👍🏼 肉眼腍得嚟唔油膩，好好食。個套餐組合有A至D，分別係A.飯/意粉/薯條；B.沙律；C.蜆肉麵豉湯；D.汽水/柚子蜜/梨汁.........原本以為呢個價咁抵，只係可以A至D揀一款，點知可以揀三款！！！所以我揀咗意粉、湯同可樂，好快我一個女仔已經飽晒，好滿足。至於我男朋友叫咗美國西冷（300g)套餐，揀咗蒜蓉汁，叫咗飯、沙律同忌廉溝鮮奶。食落去果然好重牛味，佢都話咁平食到咁多嘢好抵，佢都啱啱好。以前細個多數同屋企人去大X樂食鐵板餐，但依家佢哋啲牛扒又細塊，擺碟又肉酸，倒不如加少少錢去呢度舒適啲，肉仲好食好多嘅地方🤔下次應該會再嚟！