飲茶‧私房菜 (南豐大廈) (已結業)

講真，一入到門口等位既時候都有幾分期待，因為好多新式點心都做得好好食，唔係得個樣，所以對飲茶都有d期望。門口呢兩舊野係幾cute既，個樣呆呆地咁 ，傻得可愛。一入門第一下見到佢地，小朋友一定會鐘意。入到黎見到碗係花左心思，碗入面係有條魚游緊水，幾有中國特色，就更加覺得呢間野應該食得過，期望就愈黎愈高。仲要咁岩我地坐係bar枱，可以見到師傅即場製作點心，所以抱住好大既期望去試點心，諗住即蒸既點心都叫做有誠意。我地懶，諗住可以唔洗諗，於是我地叫左一個二人set。上菜既速度算快，我地肚餓就食住先。呢兩碟都算不過不失，係普通既水準，亦都好難會有D咩出錯既位，一般啦。湯算係高質，成個set入面就數佢最好味。點心開始出事，燒賣賣相靚但食落一般，好似普通既燒賣咁。個豬仔就唔得啦，原來係叉燒包黎，入面既餡好乾身，完全唔得。得個睇字。其實最唔得係最後黎既魷魚鬚同泡飯。我連相都無影到，因為真係食落唔係特別出色。魷魚鬚既炸粉太厚，基本上Ｄ粉仲多過魷魚。而泡飯就係個Ｄ脆米出事，如果店員可以比我地自己落就好啦。埋單都唔平，我只可以總結，呢個價錢，只係黎食環境。