沙田一至尊燒鵝·生滾粥品專門店 (已結業)

石門近年開了新商場，進駐了不少新餐廳，特別喜歡呢度較少連鎖食店，好多都係自家經營嘅小店，加上交通又方便，所以我間中都會找來覓下食。早幾日晚上來到石門見到呢間沙田一竟然要排隊，明明呢頭旺場得來又未至於要排隊食飯，所以諗住呢間一定係質素保證就同屋企人入去一試。餐廳嘅裝修新派，給人很整潔嘅感覺。見到差唔多每枱都叫了碟叉燒，賣相十分吸引，我地當然都要一試。叉燒肥瘦均勻，咬落軟冧又不會油膩，加上叉燒汁並不是一般嘅蜜糖汁，有蜜糖甜味之外亦帶陣陣梅香味，叉燒汁作為叉燒嘅靈魂比出面更勝一籌。另外餐廳作為燒鵝專門店，燒鵝一定係必叫嘅菜色啦! 我地叫了燒鵝下莊，燒鵝偏瘦唔會食到滿口油，但肉質又保持到一啲都唔靭，啱晒為食得來又想追求健康嘅我，再配上酸甜嘅梅醬汁更加係令鵝嘅味道昇華。我地再叫了個蝦乾辣炒椰菜花嘅客飯套餐，小菜煮得有鑊氣，蝦乾嘅鹹鮮味同微辣嘅醬汁更係炒得惹味。最後眼闊肚窄嘅我地再叫多個蜆芥炸鯪魚球，鯪魚肉入面混和了陳皮碎，每啖食落煮傳來淡淡陳皮香味，現時陳皮價格咁貴已經好少餐廳會用，呢度依然保存用陳皮嘅煮法係一大驚喜！