大澳德發 (已結業)

謝斐道這個地舖上兩手都是茶餐廳，但都冇辦法長期經營；今次又是茶餐廳，唔知結果會如何呢？茶餐廳個名雖然是「大澳德發」，但同「大澳」基本上沒有任何關係 ⋯⋯ 勉強來講，唯一關係就是餐廳加入了小量水上人家常見的竹筲箕作為裝修特色，而大澳就是香港最出名的水鄉。下午茶時段只求簡單醫肚，沒有太大要求及期望。第一時間卻注意到餐牌上的標誌，即時令人聯想起港英時代的龍獅盾徽 ⋯⋯ 雖然再看清楚就知道是完全不同的圖徽。另外一點吸引目光的就是串錯了英文的「MEUN」！法蘭西多士（$32）外表對板，但稍嫌多士薄身。切開之後，西多士的兩片薄方包之間塗上了花生醬，係正宗傳統港式法蘭西多士！生炸雞髀配炸薯條（$45）係真正生炸，雞皮卜卜脆、雞肉多汁；只嫌醃料味道一般、未夠濃郁。一如所料，茶餐廳的炸薯條只採用急凍預切坑紋薯條；無論口感及味道皆及不上新鮮即切即炸的 French fries。大澳生炸雞扒包（$38）令人失望。雞扒醃料味道同生炸雞髀一樣，皆只是一般而已；而且雞皮炸得不及雞髀香脆，雞扒包就變得不好吃了。