五十嵐日本料理 (已結業)

好幾年無去過五十嵐食，尋日經過禾輋無咩選擇，求其入左去食。一入去，見到環境都幾差，地下勁污糟，成間野無哂日本ge感覺（除左d日本燈籠外）。以前五十嵐差唔多淨係得日本野食，估唔到依家撈埋茶餐廳嗰範，連火腿奄列都有得食，又有珍珠奶茶，九唔搭八...........四個人叫左幾個下午茶，我吃的是叉燒煙鴨胸拉麵，又例牌加幾蚊叫埋三文魚壽司，另外叫左一客芥辣八爪魚壽司。個拉麵唔錯，煙鴨胸極度肥但味道OK，份量都足夠（以下午茶來說太多）；偷食左人地碗手打烏冬，雖然係我食過最差的手打烏冬，但都比普通烏冬好食得多，證明佢真係用手打烏冬...............三文魚壽司非常唔好食，但尚且好過上次係銅鑼灣食嗰間（詳見另一篇）；芥辣八爪魚落左勁多芥辣，完全唔知好唔好食。到左全場最差ge一環，就係佢杯凍華田！所謂凍華田，就係熱華田加冰，仲要係激熱嗰隻，結果成堆冰極速係一分鐘之內融化，融完之後仍然唔凍，非常難飲！！個杯面仲要有啲不明物質，好核突！價錢唔算平，平均每個人要四十幾蚊。另外個侍應好似未訓醒咁，落單落左五分鐘，超唔掂。