美好時菓

午膳時間本身想飲廢水輕鬆一下，點知見到尖沙咀金馬倫道開咗間水果店美好時菓，諗諗吓覺得飲果汁健康好多，就去咗買杯鮮榨果汁。

果汁種類好多，揀咗出面比較少見嘅蜜瓜汁，店主新鮮即榨，完全無落糖，飲得出係全天然嘅果甜，真材實料。

同事想食水果，店主話呢度都有果盤售賣。我哋買咗一杯紐西蘭Envy蘋果，蘋果新鮮爽脆，入口香甜，係健康又refreshing嘅下午茶之選。

除咗果汁之外，呢度都好多新鮮水果選擇。店主非常健談，傾多兩傾我都買多兩款水果先走。藍莓香甜多汁，價錢合理。難得有靚青森蘋果，蘋果大大個，富有蘋果香氣，綿密結實，香甜多汁，不愧為蘋果之王！