生生。泰港知味 (已結業)

香港真係幸福，各國美食都有。無論東南亞定歐美都實有款岩。講到夏天最岩食梗係泰國野，酸酸辣辣好開胃，連帶心情都會開心。簡潔裝備，放置左泰國獨有飾品，最顯眼係間餐廳參加左就業培訓計劃，所以員工好友善又殷勤，加分唔少。同老公二人均係海鮮愛好者，所以今餐全海鮮醫肚。其他餐廳少見既青檸辣汁鮮魷魚沙律，魷魚仲有些少餘溫，絕對係即灼即撈，所以鮮味十足仲好彈牙，清新檸味加酸辣汁，味蕾刺激好大，感覺有如上萬隻螞蟻係脷上跳舞一樣，令人又愛又恨。唔好俾佢停，繼續係冬蔭海鮮湯，由於沙律既勁辣，顯得湯就岩好，大大粒青口加上大頭蝦，鮮甜開胃，仲有椰汁香味。然後係泰式海鮮炒飯，一上台時，香味已經好吸引，顏色亦好搶眼。有黃色蛋，紅色番茄，白色魷魚，肉色青口同粉紅色蝦肉，仲有粟米粒，青豆同紅蘿蔔粒，令人食慾大增！加上鹽燒海魚送飯更係一流。魚皮輕輕一反就露出鮮嫩魚肉，入口滑流，夾雜南薑、香茅既精華，完全冇腥味感或者泥土味，令人回味無窮。生生。泰港知味雖然開左冇耐，但價格合理，員工服務態度良好，已經心郁郁想下次再食過。