吉利尼 (已結業)

唔熟悉佐敦站附近，唔知去邊搵食，行下行下，隨便就入咗呢間Killiney。佢個位址好獨特，位於佐敦恆豐中心低層地下，稍為低於行人路少少，玻璃外牆，D行人可以向下望到入嚟。落到去見人少少咁，有少少擔心佢嘅出品。有叻沙，有飯可以選擇。但似乎以叻沙比較主打，所以選擇叫叻沙，佢D餸菜粉麵可以自行配搭，好似車仔麵咁。可以揀米粉、米線、公仔麵等等，仲有其他配菜。落完order之後有個牌俾我，佢會送餐過嚟。老婆自己配搭，佢話有落錯單，多咗野，收多咗幾蚊，而且無跟餐配飲品，或者跟餐叫飲品有得優惠。但仍叫咗一杯奶茶。我就選擇咗佢預設嘅幾個叻沙之中嘅牛肉叻沙。味道相當濃郁，或者應該話過度濃郁，個湯底食下食下幾乎變成糊狀，有點倒胃口。個麵都算足料，但無乜邊個配菜比較出色。奶茶味道不錯，但性價比較低。總括而言，由於味道、性價比等參考因素，如非必要唔會再嚟。