洪祖師 (已結業)

又黎上水搵食了，趁今日天氣好同唔熱，行遠啲到馬會道睇下有咩食，最後決定食台灣嘢。由於去到已經差唔多兩點，所以舖頭無乜人，一去到就有位。午餐套餐包一碗飯及一份小食，加5蚊有台式飲品，都算抵食。今日叫咗豆腐肉燥飯，份量都幾大碗，豆腐夠滑口，而肉燥甜甜地幾好味，肉燥份量夠多，唔駛驚食到最後唔夠撈飯。小食揀咗鹽酥雞，唔好以為小食就好細份，都有成7-8舊，鹽酥雞即叫即炸，食落夠熱夠香脆，味道唔會太鹹，亦唔會炸得太乾。飲品叫咗手工咖啡，加5蚊加珍珠，咖啡味香濃，珍珠都夠煙韌，但有部份珍珠兩粒痴埋一齊，飲時唔係咁方便。