嘆嘆 (裝修中)

黃大仙有新嘢食啦😍啱晒住喺附近又鍾意食台灣菜嘅我，而且選擇好多，尤其係飲品，樣樣都想試🤣佢最大好處係有套餐揀，$138，有齊主食、飲品同甜品，一次過滿足晒三個願望😍招牌牛肉麵牛肉多到好夸張，食完啲牛肉已經七成飽🤣牛肉煮得好𣺉好入味，老人家小朋友都食到，啲麵嘅質地都啱啱好，朋友食得好滋味。古祖滷肉飯配雞翼四隻大大隻嘅雞翼，配上大大碟滷肉飯，份量十足，佢滷肉嘅味道適中，唔會好鹹亦都唔會好甜，送飯一流。我見隔離枱都係一家三口食兩個餐，我哋一人一個餐真係有啲困難😂珍珠奶茶千層蛋糕平時鍾意飲奶茶嘅朋友記得試吓啦，佢嘅黑糖味好重，同奶蓋撈埋一齊可以中和啲甜味，千層蛋糕入面好似都食到啲珍珠，好特別。抹茶千層蛋糕呢個相對冇咁甜，出面層cream嘅抹茶味都幾重，蛋糕中間嘅cream唔會好多，夾住紅豆，食完都唔會太漏。清零消脂手工花茶飲得出玫瑰花嘅香味，另外配上蜜糖，可以自己控制甜度，一壺茶可以倒差唔多五杯，慢慢嘆。特濃奶蓋朱古力朋友鍾意飲朱古力，呢杯仲加埋奶蓋，邪惡得很吸引。奶蓋唔會好漏，撈埋成杯朱古力飲完都唔會覺得好漏。