炳記牛牛 (已結業)

今日同兩個朋友去到通菜街呢頭，原本想食泰國菜，但原來原本想去嗰間咁貴…哈，聽我其中一個朋友話，佢食過炳記牛牛，話幾好食，加上見到價錢咁平，真係好吸引，於是就入咗裡面。人都幾多，所以環境相對上感覺都幾擠迫。望望個餐牌，見到啲嘢食真係好平，真係幾唔錯喎！於是我叫咗個芝士三文魚焗意粉($29)，有個朋友叫咗常餐($24)。其實見到我個意粉$29蚊，都唔會期望咁高，所以當我食我個意粉嘅時候，就冇咁失望。三文魚唔係太好味，而且意粉焗得麻麻地啦。最後我都食唔晒…我朋友話，佢之前黎食真係ok架。嗯，所以正如我個標題所寫，可能今日間餐廳咁啱水準冇咁好。不過最值得一提係，當我地埋單嘅時候，發覺畀少咗錢。我地就好奇怪，明明我地夾好晒條數先出去埋單喎。個女侍應見我地畀唔足錢，而且好似冇好快回應嘅時候，就冷冷咁話：「要加一架！」我真係有點愕然，因為我地從來都睇唔到餐牌有咁寫，可能係我地大意睇漏咗啦。不過若果服務更加好嘅話，我會覺得呢個加一「服務」費會畀得更值得。雖然呢餐晚餐唔係太好味，不過我下次都一定會再黎試。P.S. 因為食飯時唔記得帶相機，所以冇得畀大家睇相。下次黎食飯，一定會影！