隆姐泰國美食館 (已搬遷) 新店位置

早前聽朋友說，剛食過這裏，食物幾好；立刻便心思思想來試，早幾日兩個人終於來了試。我們叫了菠蘿啤、香辣乾炒海鮮河粉、泰式炒通菜、炸蝦餅春卷雙拼和海生蝦沙律。菠蘿啤- 看到個名"禁"特別，就叫來試試，飲完都唔覺有酒味，再看看瓶身，才知酒精度得0.5 至1 % ，難怪唔覺有酒味；味道幾特別，淡淡的菠蘿味，但感覺像菠蘿水多一點。香辣乾炒海鮮河粉- 看到這菜有兩隻辣椒，本來都唔打算叫，但辣椒女又話想試試，最後當然又係叫了；海鮮雖然是雪藏貨，都算幾好味，河粉係粗身的，本來我應該係好喜歡的，但因為腍在一起炒，河粉內部變得沒有味道，感覺一pat pat的，實在可惜。泰式炒通菜- 通菜幾新鮮，又唔會炒得太老。炸蝦餅春卷雙拼- 新鮮炸起的蝦餅，新鮮彈牙，可惜蝦味唔多覺；春卷味道幾好，但可惜唔夠脆又厚身，一口咬下去，都幾難分得開。海生蝦沙律- 最喜歡的一味，蝦新鮮彈牙，放上雪粒，保持蝦肉的冰凍；蝦頭炸過一起上，唔新鮮就不能做出這味菜，還細心的把蝦腦也抽出，沒有了那陣苦味。食落感覺幾像蝦片，值得一試。人少少，不能試到多少食物；下次一定要找多一點人再來試過！可惜這裏的環境，感覺像茶餐廳多一點。