新澳咖啡餐室 (九龍灣工業中心) (已結業)

九龍灣工業區夜晚9點都無乜選擇，見佢未關門就食啦。佢有生炸雞脾煎蛋飯都幾吸引，但咁夜又唔想食咁飽，都係食常餐。睇食評啲相炒蛋份量幾多就即管叫下。叫左「香煎豬扒出前一丁+炒蛋+蒜茸牛油多士+凍檸茶」。一上碟，整體賣相唔錯，但有樣唔係幾好就係塊豬扒浸係湯，最好其實放碟，話晒係「香煎」，浸湯點都有啲影響。先食多士。佢有多士或者豬仔包，但豬仔包佢唔係配奶油就揀多士。不過，都有食評話多士唔脆。可能夜晚唔太多人，有時間整，多士係脆嘅，蒜蓉夠香而牛油份量多，好味😋。炒蛋其實睇人啲相我預左係唔太好食嘅，因為佢係炒到熟晒。份量比起其他茶餐廳係多，亦都一如所料係熟晒，但佢炒得幾香，相信有調過味，可食用。但建議唔好炒到咁熟會加分好多。塊豬扒幾厚身亦煎得幾靚。肉質唔實，算叫煎得啱啱好，邊位肥膏位煎到脆口，食落口油香出晒黎，我重口味就最鐘意。麵就正常，不過不失，我鐘意少少透明嗰種程度，但佢唔係。成個餐都算好食，滿意，可以再食，下次試佢炸脾。