麵屋豚豚拍子 x 辛味屋 (已結業)

見新都城二期開左間新嘅日本野。次次都好多人排隊，難得今次冇咁多人就諗住試下新野。入座後想落單，叫左好耐都冇人理，明明啲員工係旁邊行過但都扮睇唔到。過左一陣終於有個貌似老闆嘅大叔過黎幫我地落單。筷子好唔乾淨，用紙巾擦完張紙巾係黑色嘅嚇到我要再洗多次先敢用。個炸蠔有3件，但個醬明顯唔夠3件蠔同個椰菜絲。枱上沒有其他的醬汁搭配椰菜絲。問侍應都醬汁問幾次都冇人理。個椰菜非常之苦，苦到食唔到。個蠔還好，已經係今餐最好食嘅野。叫左個炸雞塊咖哩烏冬。個咖哩湯非常稀，有香味但食落就冇乜味。似水咁嘅湯底。炸雞塊就好乾同硬。另外仲叫左個吉列豬排咖哩飯。味道就係超市買嘅咖哩磚嘅味道，沒有特別。反而個漬物就好似日本嘅味道。但有樣好奇怪嘅事，就係個粟米。我地叫左2個餐而2個餐都有粟米。但一個有醬一個冇醬，唔知係落漏左定一個唔小心滴左落去呢。最後令我十分驚訝嘅係杯野飲。我地叫左2杯飲品。一杯係奶茶一杯係咖啡。但望住呢2杯野真係估唔到邊杯先係奶茶。左邊黑到成杯阿華田咁唔講真係唔知係杯奶茶。澀到完全飲唔到。咁嘅服務仲要收加一，以後唔會再去。