串燒園林 (已結業)

平時都鍾意一班朋友燒嘢食，圍埋個爐有傾有講，嘻哈一晚，但最憎义嘢食搞到隻手污漕邋遢，有時仲拮損手添，之後出現咗現成串好食物嘅燒烤場，但試過環境及食物麻麻，冇下次。上星期六同朋友試咗呢間”串燒園林”，入到去環境唔錯，地方好大，職員都好有禮貌，可能落雨關係，客唔多，即刻有位。百零蚊任食，啤酒汽水任飲，好抵。最正係每位會送大蝦，蜆，波蘿，香蕉，金菇，都算大手筆。基本嘅豬扒，牛扒，雞扒，雞翼，腸仔，丸類都醃得好味，但居然有我至愛嘅羊架，仲好好味，驚喜…另外仲有雞軟骨，煙肉車里茄，脆肉瓜呢啲傳統燒烤場冇嘅嘢食，真係滿足到唔同口味嘅人。發現有扇貝同生蠔，每隻$10-$20內，抵食，燒完都好鮮味。當晚遊樂區落雨冇開，如果唔咪一家大細嚟真係唔錯，搞大型燒烤派對都得，不過可能要預約。