台灣郎 (已結業)

由紅磡行去黃埔嘅路，中間有唔少嘅餐廳，去到百寶坊嗰度附近，有一間新開嘅台式餐廳，叫做台灣郎。於是打開OpenRice睇睇有冇分店，見到佢啲分店嘅好評都好多，所以我哋去睇下個餐牌，都覺得幾啱食，所以就入咗去。都幾多人排隊，可能因為新開張，我哋入咗去之後，我見其他人都要排三四個字先至入到。好彩我哋早左黎，所以唔駛等咁耐。不過我哋坐係吧枱，有啲辛苦，因為咩住個背囊之類啦。但係都唔理喇食咗先講。於是我哋叫咗紅燒牛肉麵同埋燥肉飯。等再一陣，嚟咗個燥肉飯先，細細碗，但係好香，仲有隻滷蛋，可能係豬油嘅關係啦所以特別香。越食越想食，但係佢好細碗，一碗飯應該唔夠飽兩個人。好彩叫多咗個面，碗麵嚟咗，好大碗，同碗飯係一個好強烈嘅對比。牛肉炆得好淋，個湯底都好好飲酸酸辣辣，而且有青紅蘿蔔，唔會好寡。佢個麵都唔會好淋，連埋湯飲好正。不過因為我哋兩個人，所以都係叫咗啲一人份量嘅嘢，但係佢係有啲似小菜館咁樣偏向係食小菜。所以佢啲嘢食都係偏貴嘅，如果人多好似去食大排檔咁會好啲。