荃灣，對我嚟講並唔陌生，因為有個auntie 住喺荃灣，細細個已經成日去荃灣，到大個咗兜兜轉轉都喺荃灣返工！
豪興， 係我細個去探auntie嘅時候佢帶我去食㗎！嗰陣時仲係舊舖，喺四陂坊好出名嗰間雲南米線隔離，仲記得嗰陣佢淨係買上海麵同煎餃！而家搬咗去新鋪，門面光鮮咗，餐牌多嘢食咗，個名仲加埋茶餐廳三個字添！雖然係咁，我都係冇食過佢其他嘢！我每次幫襯都係食同一款～酸辣雲吞上海麵！
記得我第一次食嘅時候，仲以為佢係上海式酸辣湯，點知原來佢係酸菜加辣湯。可能有人覺得好奇怪，但咁嘅配搭有幾啱我胃口！可能我鍾意食酸菜，加埋辣辣地嘅湯底，用白菜仔豬肉做嘅上海雲吞，再配埋幼嘅上海麵，堅夠飽肚！
