星巴克咖啡 (已結業)

曾經喺 Das Gute 買過一款朱古力古法冬甩，我同亞仔都覺得好好味，最近經過 Starbucks, 發現原來佢都有一款朱古力古典冬甩出售，由於有之前美味嘅經驗，所以立即選購咗一個。朱古力古典冬甩 ($17) --- 呢個同 Das Gute 嗰款有啲唔同，Das Gute 嗰個只係用朱古力覆蓋冬甩嘅其中一邊，但 Starbucks 呢個係全個冬甩都用朱古力冚住，朱古力味濃郁啲，雪凍食仲有少少脆口，但甜度亦相應提高咗，會覺得"漏"啲，有種甜到痺嘅感覺。 Starbucks 呢款整體嚟講不過不失，但價錢較貴，Das Gute 上次做 promotion, $11 兩個，依家就 $7 一個，比較抵食。另買咗一款蘋果酥冬甩 ($17) --- 賣相怪怪的，好似脆蔴花咁，外面有層薄薄嘅糖霜，但一啲都食唔出蘋果味，咬落去個冬甩煙煙韌韌咁，不過無古典冬甩咁甜，食吓食吓竟然有食緊牛脷酥嘅感覺。