牛極 (好順利大廈) (已結業)

放工好肚餓，近近地到屋企附近的牛極食個飯，貪佢飯，湯，菜都可以任食，仲唔使加一，幾抵食呀。一到門口，店員會先量體溫同消毒雙手先準入內，衞生啲大家都安心。個人覺得用在酒精搓手先攞用具更好，顧己及人。湯同飯，打開佢熱辣辣㗎。沙律同醬汁，refill得好快。點了牛柳200g，連埋任食嘅野，呢份餐好豐富。200g都幾大件喎，比想像中多。上枱時一成熟，之後就根據自己喜好去燒幾熟啦。個人就偏好熟一點，切細片燒到兩邊無血水出，好正，牛味十足又嫩滑。可以點埋燒肉汁，辣醬或生蒜，我就鍾意加生蒜啦，如果你都唔怕有口氣嘅話，生蒜個種辛辣好正㗎。沙律可以揀麻醬或柚子醋，兩種都有試，個人就鍾意麻醬多啲，柚子醋偏酸。白飯軟綿綿的珍珠米，口感好正又有飯香，空口都食到成碗！湯係雜菜牛肉湯，酸酸地嘅蕃茄味，個人覺得鹹左少少。舊燒牛可自己加調味料，我就覺得唔落都好好味啦。店很少，現在又只能半數入座，繁忙時段都等幾耐，我就揀左食早場避人啦，哈哈。