友利坊 x 友利冰室 x 勿當奴 (已結業)

由新蒲崗食到荔枝角再食到嚟太子，友利坊嘅燒味始終高質，跟相同價位嘅食肆比較，我夠膽講，一定穩佔九龍區嘅頭三位。嗰晚九點幾先去到，匆匆忙忙叫咗個燒味燉湯套餐，燒腩仔嘅皮咁夜仲係脆卜卜超香口，加埋肥瘦分明嘅肉質，真心勁好食。相比之下，叉燒雖然都肥瘦分明好正，但就冇燒腩仔咁驚艷啦。另外又要讚下個花膠螺頭燉雞湯，非常足料，花膠螺頭雞肉瘦肉一應俱全，齋食湯渣都飽咗幾成，燉湯亦夠清甜，好飲。個餐仲有大大碟油菜同大大碗白飯，七十幾蚊，性價比咁高，你話去邊度搵？