Candy Shake (已結業)

同契妹食完抹茶甜品後就準備離開旺角，為咗要消耗多啲脂肪，二人專登兜遠少少去油麻地搭地鐵 。別號「旺角通」o既契妹仲帶小肥一遊區內之食街，即登打士街，乘機走咗入去幾間入圍熱店度八吓 。路經「Candy Shake」門外時，碰巧姐姐仔剛剛攞出新鮮焗起o既芝士撻，實在令人難以抗拒 ，結果當然係要一試啦！小店樓底極高，頭頂仲掛上水晶吊燈，喺鬧市內感覺都好清新。雖主要為外賣店，不過貼牆都設有兩邊高櫈座位。牆上則以主打食材之糖果作裝飾。四周亦貼有特飲「Candy Shake」o既餐牌。要食芝士撻必先喺收銀處落單付款。收銀旁有個透明玻璃雪櫃，陳列出多款精美甜品。樑上o既彩色餐牌亦列有不少奶昔特飲。但由於啱啱先喺附近食完同飲完一輪，所以就算見到個「Candy Set」最合乎經濟原則都要同飲品說不，只單點芝士撻。原味半熟芝士撻（$18）：新鮮出爐o既芝士撻層曲奇餅皮好夠香脆，個半熟芝士餡流心又軟滑，點知食後先發覺自己未有拍下靚撻獨照 。嘻嘻，為咗要補影，所以就決定外賣多兩件俾家中兩位小堂弟妹作飯後甜品 。