好好運快餐店 (已結業)

被譽為全港最好食沙爹牛，真係要試下係咪咁正，轉左大舖多好多位，地方企理整潔，而家周末午餐都唔使點排隊了。沙爹牛麵餐 $50以茶餐廳來說價錢略貴，但配兩餸同包飲品。唔知係咪期望過高，食落又冇啲人吹捧咁好食。沙爹汁未有想像中般濃，沙茶味偏重帶丁點甜味(?)，花生味好似唔係咁突出。個人喜歡較濃花生味的沙爹醬，不過依然不失為好食的沙爹牛，餸麵點都無得輸。牛肉大大嚿好嫩滑，份量好多，不過都有少少筋。公仔麵用上大光麵真係幾好食，口感彈牙唔會過腍。太陽蛋有脆邊正，紅腸超厚切有煎香。最近佢地仲推出外賣一磅裝淨沙爹牛$50，好多人預訂，一場嚟到都即場買咗一盒返去整下沙爹牛菜式🤪。