有次喺尖沙咀食完野，諗住行去呢度食甜品。當時八點幾，但係已經好多人排隊，而且啲刨冰都賣晒，於是就叫咗水蜜桃茶沙冰🍑
杯嘢飲都有成個手掌咁高，上面掛住半個山梨縣嘅白桃，旁邊有少少忌廉。每一啖嘅沙冰都真係勁有桃味，似係用好多個桃濃縮出嚟嘅果汁。食食吓啲沙冰入面都仲有幾件桃肉係到，非常足料！溶咗嘅沙冰又可以當桃汁咁飲😋
後尾過咗一段熱潮，五點幾去到都仲有刨冰食，而且冇人排隊。叫咗博多雙重草莓刨冰食，成舊野仲高過一個人嘅頭。
上面淋上去嘅士多啤梨汁勁好食，唔係啲好假嘅藥水味之餘，仲要好似加左少少煉奶咁，酸得來又甜甜地，勁開胃勁啱女仔食❤️ 下面啲冰望落冇士多啤梨汁，但都唔使擔心，因為啲冰就係包住左入面，有士多啤梨肉同埋士多啤梨醬，不過呢個就冇影到相～
雖然價錢望落好貴，比起一般街邊食嘅甜品再貴啲，但呢個食物質素完全係值得呢個價錢！😚
