龍門冰室 (已結業)

今日咁啱出開銅鑼灣有少少肚餓，見到龍門冰室，應該新開不久，就同朋友入咗去試吓食。食物選擇比一般茶記更多樣化！我揀咗一個星級雜扒餐，當中包括西冷扒，雞扒，英式腸，煙三文魚同埋炸帶子。汁方面我就揀咗黑椒汁，配菜我就揀咗薯菜。除咗扒餐之外，佢都包左一個餐湯同埋一杯熱飲。扒餐係鐵板上，當黑椒汁林上去嘅時候仲會有吱吱聲。而西冷扒肉質鮮嫩，其他腸同三文魚亦都10分新鮮。以呢個價錢來講係物超所值。除此以外，朋友叫咗一個芝士蜆肉意粉，意粉用料十分充足，而且口感彈牙，拍得上一般西餐廳嘅水準。餐飲方面我哋就叫咗熱檸賓，檸檬冇澀味係一般茶餐廳嘅水準。侍應做野好快手，又好有禮貌，總括嚟講呢間茶餐廳嘅質素係中上值得一試！