八哥主題餐廳 (已結業)

自己一個孤獨精無無聊聊周圍行，見到條街呢度有張海報，初先以為外賣甜品，望真原來樓上2樓有野食。上到黎，呢度坐位夠闊落，周圍佈置都有狗狗，餐牌，紙巾，甜品碟都有，淨睇都開心。睇下有咩好食先。紅咖哩牛肋條飯，好有心思呀，D飯飯砌到骨頭狀，仲要一放底，已經好有椰香咖哩味。個咖哩汁夠辣，辣得黎好椰好香，牛肋條咬落係爽脆唔黏牙。蘋果金寶配雪糕，成件事真係演繹得好好，呢個蘋果金寶係暫時見過最靚既，出面好多時係求其將個雪糕放係蘋果金寶上面就serve比你。先試呢個藍莓雪糕，食落有粒粒藍莓碎，雪糕既口感介乎於雪糕雪芭之間，冇甘膩之餘，仲可以突出藍莓小小酸既味道。食完雪糕，蘋果金寶仲係熱架，上面D脆脆香脆可口，下面既果肉仲暖笠笠，所以廚師好細心，分開serve係有原因既，抵讚！其實我已經飽，但好奇心下，都試下右邊呢個cream, 不得了！個cream裡面好有空氣感，食落係cream既味道，但有棒棒棉花糖既質地。連蝴蝶都食得架，蝴蝶係薄薄既一張糖紙，入口即溶，絕對唔係平時係西餅舖買既一大舊厚厚糖餅。呢度真係又睇得，又打得。